الخميس، 11 نوفمبر 2010

دة كلام تلفزيون يا أستاذ

هي الدلتا حتغرق ؟؟؟؟
لا الدلتا مش حتغرق

هكذا بدأ الحديث بين استاذ محمد وعويس  حول غرق الدلتا

 استاذ محمد : بص ياسيدى انا حفهمك الموضوع معدلات درجات الحرارة زاد مما يؤدى الى زوبان الجليد فى القطب الشمالى وبتالى زيادة منسوب مياة البحار الذى سوف يؤدى الى غرق بعض المناطق فى الدلتا



عويس : يا استاذ انت عمال تتكلم زى بتوع التليفزيون لية تقول معدلات ومنسوب وزوبان الجليد والقطب الشمالى اية الحجات الغريبة دى انا مش فاهم حاجة خالص



استاذ محمد : شوف ياعويس انا حشرحلك الموضوع بمنتهى السهولة بس يارب تفهم منا عارف انك زكى خالص الارض الى احنا عايشين فيها دى عبارة عن مجموعة من البحار والمحيطات زى بحر اسكندرية كدة وبحر مرسى مطروح والحجات الحلوة الى انت بتبلبط فيها دى



عويس : ايوة حلو اووى بحر مرسى مطروح دة انا بحب اتفرج علية فى التليفزيون بس عمرى ما روحت هناك
استاذ محمد: الحمد لله انك فهمت حاجة فى بقا بحار ومحيطات زى بحر إسكندرية دة بس عبارة عن جليد - ثلج يعنى - بيسموها المنطفة القطبية
عويس : ياحلاوة يولاد يعنى المية فيها ساقعة كدة وحلوة
استاذ محمد : لا ثلج زى الى انت بتحطة فى فريزل الثلاجة
عويس : إيوه عارفة انت مفكر انى غبي
استاذ محمد : قولى بقا ياعويس لو انت طلعت الثلج من الثلاجة اية الى يحصل
عويس : بعد شوية يبقا مية
استاذ محمد : جدع ياعويس هو دة بقا الى بيحصل فى المحيطات والبحار الى انا حكيتلك عليها
عويس : ازى يعنى
استاذ محمد : انت  مش كونت بتقولى ان الدنيا حر اوووى السنة دى
عويس : ايوة والله دنا حتى كونت بفكر اشترى مروحة كمان احطها فى الاوضة و كان شيخ الجامع بيقول ان دة غضب من ربنا علشان ذونبنا كتير
استاذ محمد : الشيخ قال كدة
عويس : ايوة والله علشان كدة انا مشترتش مروحة وأعت أدعي ربنا انة يخفف غضبة والحر يخف شوية
استاذ محمد : جدع ياعويس لما الدنيا بقا تبقى حر قوى كدة الجليد الى فى البحار والمحيطات دى بقا يزوب ويبقى مية
عويس : طيب كويس مش هما بيقولوا ان الدول بتاعة افريقيا السود دول الى انا مش عارف اسمهم مش عاوزين يدونا مية اهوه ربنا بعتلنا مية من كل مكان
استاذ محمد : ناس سود مين ومية اية اسكت ياعويس دة مش كويس خالص
عويس : لية بس يا استاذ
استاذ محمد : لان المية دى لما بتزيد أكتر من الازم مستوى سطح البحر بيزيد ولما مستوى سطح البحر يزيد فى مناطق كتير حتغرق
عويس : مستوى سطح البحر يعنى اية دة مش فاهم
استاذ محمد : لو انت ياعويس تجيب ازازة مية وتفضيها فى كباية لما الكوباية بتتملي اية الى بيحصل
عويس : المية بتقع من الكوباية على الارض
استاذ محمد : جدع ياعويس هوة دة الى حيحصل بالظبط الثلج لما يزوب حينزل فى البحر ولما ينزل فى البحر البحر يزيد فيدخل على الارض وبكدة مناطق كتير حتغرق
عويس : طيب واية الحل
استاذ محمد : الحل اننا نشوف السبب الى بيخلى الدنيا بتبقى حر ومنعملهوش
عويس : يعنى نبطل زنوب ونعد ندعى ربنا
استاذ محمد : وهو اية علاقة الذنوب بالكلام الى انا بقولة
عويس : مهو الشيخ صديق قال كدة
استاذ محمد : مهو انت كدة كدة لازم تبطل معاصى ياعويس وتعد تدعى ربنا لكن الموضوع الى احنا بنتكلم فية دة ملوش دعوة بالمعاصى
عويس : امال لية دعوة باية يعنى
استاذ محمد : لية دعوة  بطريقة تعاملنا مع البيئة الى احنا عايشين فيها
عويس : انت رجعت تانى لكلام التلفزيون بيئة اية ياعم فهمنى براحة
استاذ محمد : يعنى احنا ياعويس بنعد نقطع الشجر ونطبطل نزرع الارض علشان نبنى بيوت عليها مش كدة  مش انت بطلت تزرع وبنيت بيت فى الارض بتاعتك
عويس : أمال يعنى اتجوز فين يا استاذ
استاذ محمد : كمان ياعويس انا كل لما بعدى من قدام بيتك باليل وانا راجع من الشغل اشوف نور البيت كلة عندك مولع وكمان صوت التسجيل وانت بتكون نايم
عويس : ايوة سعات بسيب النور مولع بكسل أطفية هو والتسجيل وبعدين منا بدفع فواتير الكهرباء فى مواعيدها
استاذ محمد : وكمان ياعويس كل يوم اشوفك ماسك خرطوم المية وعمال ترش قدام بيتك لحد لما كأن فى ماسورة مية ضاربة
عويس : ايوة مهو علشان الحر ونضافة وبردة انا بدفع فواتير المية
استاذ محمد : كمان ياعويس انت بترمى الزبالة بتاعتك فى الخرابة الى فى ظهر بيتك لحد ما عملت جبل زبالة
عويس : مهو صندوق الزبالة بعيد وبعدين كل الحجات الى انت قولتها دى اية علاقاتها بالموضوع الى احنا بنتكلم فية
استاذ محمد : دة هو دة الموضوع ياعويس احنا بنستخدم كل حاجة غلط يعنى الشجر الى احنا بقطعة والزرع الى مش بنزرعة ونبنى بيوت على الارض مكانة دة بيساعدنا لانة بيقلل نسبة ثانى اكسيد الكربون ويزود نسبة الاكسجين لما انت بتسيب النور والع طول اليل دة بيستخدم طاقة اكتر نولد بيها كهرباء ودة بيزود نسبة ثانى اكسيد الكربون ولما انت بتسيب الزبالة تتخمر دى بردة بطلع غازات كتير ضارة
عويس : كل دة بيحصل من الحجات الى انا بعملها وبعدين اية ثانى اكيد الكربون دة ولما بيزيد بيعمل اية يعنى
استاذ محمد : كويس انك اخت بالك من ثانى اكسيد الكربون دة لان دة هو سبب معظم المشاكل دة بقا ياسيدى نوع من الغازات الى كترتها بيضرنا
عويس : ازى يعنى
استاذ محمد : الغاز دة لما بيزيد بيحبس اشعة الشمس الى بنزل على الارض يعنى يخليها تنزل وما تطلعش وبكدة درجة الحرارة تزيد والجليد يزوب ومنسوب البحر يزيد ولو دة حصل فى اجراء كتير حتغرق
عويس : كل دة يااااااااااااااااااة ياستاذ احنا وحشين أوووى كدة احنا الى عملنا كل دة فى نفسينا بس تعرف ياستاذ
استاذ محمد : نعم ياعويس

  عويس : عمر ماحد فهمنا عمر ماحد قلينا طول عمرهم بيكلمونا من برج عالى بيتكلموا كأنهم بيدو محاضرة فى الجامعة عمر ماحد فيهم كان بيتكلم بطريقة يفهم بيها الراجل البسيط الى زى حالتى إن فى خطر وأنا الى كونت مفكر ان كل الى بيحصل دة غضب من ربنا


دة بقا مش عويس

بقلم /مصطفى ابوسليم

الخميس، 4 نوفمبر 2010

اصبحنا نمتلك حضارة ولكننا ايضا نمتلك مستقبل مشوش

هل من الممكن ان نستيقظ يوما ولا نجد غير النقود بجانبنا لايوجد شجر ولا توجد مياة ولا يوجد زهور

قد تندهش مما اقول ولكن من الممكن ان يحدث هذا الكابوس بسبب طريقتنا السيئة فى التعامل مع البيئة

البيئة التى اهدارنا مواردها واهدارنا ثرواتها لوثناها ولم نعرف اننا عندما قمنا بهذا كونا نلوث مستقبلنا قبل ان نلوثها

اصبحنا نمتلك حضارة ولكننا ايضا نمتلك مستقبل مشوش

فهل ياترى ماذا سياحدث اذا استمرارنا على هذا المنوال